你 手提手機仔 一直相咧翕
我 手搣一搦草 一直搝咧食 彼暝 轟轟隆隆 阿爸共阮攬咧 免生驚 彼是露西亞咧放煙火 阿爸講 伊 嘛欲去放煙火 這暝 兇兇狂狂 阿母共阮牽咧 免驚惶 彼是逐家咧徙厝 阿母講 咱 嘛欲去避難 我問阿母 阿爸咧? 阿母應 伊轉去矣! 陣陣響亮的炮仔聲 雺煙散霧 我揣無阿母 我問阿姨 阿母咧? 阿姨應 伊睏去矣! 揣無阿爸 我一直吼 揣無阿母 我一直咻 請問 恁的手機內 敢有阮阿爸? 請問 恁的手機內 敢有阮阿母? 我想欲聽阿爸講 伊欲抱阮 我想欲聽阿母講 伊欲唚阮 In拭掉我滒塗粉的目屎 牽我的手 阮 欲作伙轉去厝 暗時九點矣 趕緊去睏
趕緊去眠床頂 去被空內 毋是欲眠夢 是party就欲開始囉 月娘準備欲點名矣 窗仔簾真歹勢 麻煩你先去邊仔 因為妖精欲共窗仔開起來 才有法度予 暗光鳥看著 阮有準時出席 頭先是夜鶯咧唱歌共阮歡迎 𧌄蜅蠐嘛欲起鼓囉 恁一定攏毋知影 被空內有一个祕密ê巷路 跳入去 就會拄著一隻趕時間ê兔仔 毋過阮時間真濟 會當沓沓仔行 序幕拄欲開始爾爾 恁敢知影逐工Peter Pan攏會𤆬阮 飛去天頂 揣嫦娥做伙跳舞 趕時間ê兔仔嘛佇遮 原來伊是趕欲舂藥仔 若是跳甲忝矣 就佇雲尪仔頂小歇一下 有時陣無細膩就睏去矣嘛無要緊 等待日頭精神ê時陣 就會提醒阮party已經結束 亂鐘仔開始踅踅唸 阮嘛欲對被空內ê巷路傱出來 離開眠床ê時嘛宣告party ê結束 換衫 洗喙 食早頓 叫日頭幫阮共月娘講 「今暗閣再來」 蓮霧 蓮霧 好果子 每年若到大出的時 親像一捾一捾的風鈴 掛佇樹椏紅記記 烏真珠 色緻媠 敢若姑娘仔嬌滴滴 烏璇石 臍若開 蓋成阿不倒啉酒醉 挽落來 共食一喙 M̂~ 飽水清甜好滋味 包你愈食愈紲喙 老師講
目屎是思念結成的真珠 覕佇天頂,閃閃爍爍 較早阿母講 七月初七會落雨 牛郎哥哥橋頂看著織女姐姐 一年一擺,思念、擔心予 規天頂的真珠落落來 我欲共阿母講 今仔日,七月初七,好天 牛郎哥哥和織女姐姐,無流目屎 放下超過千年的思念 相信對方 一个人 嘛有幸福,嘛有快樂 我欲緊共逐家講 幸福,若今仔日的日頭 是祝福 溫溫,燒燒 起一間厝 有 tsāi-tsāi ê 四箍牆圍 是咱ê手 起一間厝 有 tsa̍h hong ê壁堵 是咱ê 跤 起一間厝 有 jia-hōo ê厝頂 是咱ê頭殼 起一間厝 有 tīng-tauh ê 地基 是咱ê勇氣 我有手、有跤、有頭殼、有勇氣 我愛來,你mah來,阿兄阿姊阿爸阿母做伙來 起一間厝 An-tah 咱 ê 厝內人 起一間厝 毋通koh做一個流浪ê人 |