佮你做伙peh山,是我母捌想過的代誌 踏著貓霧仔光出發 青苔為咱tshuā路 孤單佇山跤哭欲綴路 行佇阻礙的石頭仔路 三千三百公尺 連百年的神木攏來笑我天真 有松柏檑精為咱看顧 有山神送來清爽的風 白眉仔唱歌愛咱免驚 月娘的鏡佇山的那頭等咱 佮你同齊爬山,是我日夜想欲做的代誌 行佇哭坡的路上 肩胛頭負重八台斤 隨機問欲行落山的山友 「愛閣行多久才會當到山頂頭」 「真緊,欲到啊!」這是行山人的白賊話 「按呢,愛閣行多久才會當到你的心肝頭」 「真緊,欲到啊」,煞是坑崁的回音 佮你鬥陣爬山,是我堅持一定愛做的代誌 現在就出發 毋通等到二十年後才來敲彼通電話 行忝啊 咱就歇喘敨鬆一下 看你目睭內的河溪予我有信心會當閣行落去 揣我目睭內的流星予你充電佮支持 山頂無手機仔的信號 山上嘛無戰爭的消息 佇Cidanuman Buan的面前 傾訴咱心裡的話 落山時,戰爭就結束啊 落山時,病毒就無蹤影矣 欲閣來無? 「無愛」這是peh山人愛講的顛倒話 日頭沓沓仔照 石頭沓沓仔暖 阮沓沓仔行 這款日子 什物攏不應該上緊 佇溫柔ê花邊 佇閃爍ê水邊 佇燒烙ê石頭邊 阮沓沓仔等 等日頭沓沓仔落 等一工 沓沓仔過去 日頭拍咳啾 網路電話線齊咬冷筍 血路勿會順的影片佮聲音歸去斷腦筋 有一種等待 干若哮落葉聲 無過癮的目眶 寂寞原在咧花 全世界眠夢歸工的拖磨 當欲提議心涼脾肚開 杜蚓的歌韻煞烏天暗地 垃圾拍字做風颱 干若看著網站家家戶戶稀微的樓窗 風颱倒頭栽腹內 戰爭躊躇佇千萬个鏡頭之外 毋甘啄龜 隨時連線抹粉就臺釘孤支 各色美女得人疼的眼神總收擔 五花膨風塞佇吶喉激死飄撇男兒 人類開始放捨緣投的拖磨――手機 遊賞這个世界 有人暗叫一聲走精的肩胛頭 無張持彼个真實的滋味無論圓抑扁 共伊攬牢牢 批紙將思慕總鋪 挖出來的心結敨開記持 做人的芳味開始圍纍投合 咱喘氣的腳步總算慢落來 不過是人生嘛 時間是傀儡線無毋著 是講有坱埃無 你講 未來閣想欲去佗位 做咱毋捌做過的代誌 你講 咱未來欲蹛做伙 閣問我想欲蹛佇tuē 咱有真濟時間會當走揣 你講 未來若拄著困難 咱會當做伙面對 做伙挑戰 你講 你袂離開 會留佇我的身軀邊 雖然咱是兩條平行線 毋過咱的手若是牽咧 未來嘛會做伙行lueh 我開始相信你 我想欲相信你 佮咱的未來 你煞留遺書 求阮 共你的骨烌掖lueh海底 無法度決定家己的出世 至少會當選定家己的死 總是 時間已經過 你講的白賊話 攏無法度實現 咱佇過去所講的未來 嘛無咱兩个人的存在 只好 等待轉去的時 閣再相會 才共遐的白賊話 一个一个 實踐 目睭擘開,窗仔外射入來一箭。 「閣舞甲sioⁿ晏矣。」 昨暝ê《茶花女》,綴著箭尾ê風, 早就毋知飛到佗一頁、佗一跡, 我嘛無按算閣去siōⁿ。 「整理一下,愛轉去矣。」 被摺好,枕頭囥予好,閣有擲佇塗跤、眠床尾ê衫仔褲, 拍開水道頭,捀一把水,溫暖ê流過我ê面, 感覺淡薄仔熟似,敢若捌佇佗拄過, 照著鏡,看著家己,才知影是一片花園。 「等下hōng看著,閣欲hōng剾洗矣」 外套幔咧,鎖匙扲咧、手機袋咧, 徛佇門口,咬一支昨昏捲好ê薰。 「這牌ê有較厚呢,毋過誠芳。」 點落去,欶一喙ê芳甜,吐滿腹ê苦澀, 毋知是睏無眠,猶是薰sioⁿ厚, 頭煞有小可仔楞,siōⁿ欲講啥,嘛無啥好講。 「先來矣。」 「Bye-bye.」 你無話欲送予我,我無話欲留予你, 就按呢離開,等待後一擺, 某一个無聊寂寞ê暗暝, 提走你欲愛ê,提走我siōⁿ欲ê 。 |